Food Lovers 老 字 號 誓 不 低 頭 大 發 行

創 業 二 十 七 年 的 日 本 食 品 入 口 商 大 發 行 ， 在 行 內 一 直 不 是 No.1 。
論 鼻 祖 ， 有 近 藤 。 講 後 起 ， 有 海 寶 。 數 翹 楚 ， 有 大 亞 。
大 發 行 ， 從 沒 登 過 頂 峰 ， 且 一 直 捱 打 ， 在 市 場 佔 有 率 上 ， 已 由 原 來 三 大 跌 至 今 天 只 排 第 四 五 。
不 過 ， 若 要 說 頑 強 ， 大 發 行 可 以 說 是 No.1 中 之 No.1 ， 因 為 這 些 年 來 ， 它 都 在 和 命 運 周 旋 ， 拳 拳 重 擊 ， 仍 屹 立 至 今 。
甫 起 步 ， 股 東 突 然 拆 夥 ， 剛 儲 落 的 客 戶 ， 被 連 根 拔 起 。

它 由 零 開 始 ， 改 名 大 發 行 ， 以 屋 企 作 鋪 作 貨 倉 ， 靠 一 家 人 胼 手 胝 足 ， 花 了 十 多 年 ， 才 一 點 一 滴 把 生 意 累 積 回 來 。 這 是 第 一 拳 。
陣 腳 才 剛 站 穩 ， 誰 知 一 場 金 融 風 暴 加 沙 士 ， 大 量 食 肆 遭 殃 ， 連 累 它 的 生 意 額 跌 了 55% ， 靠 燃 燒 老 本 來 保 命 ， 幾 乎 沒 頂 。 這 是 第 二 拳 。
好 不 容 易 捱 過 沙 士 ， 以 為 生 意 慢 慢 轉 好 ， 孰 料 不 少 對 手 都 引 入 廉 價 國 產 冒 牌 日 本 貨 ， 一 向 只 入 正 版 日 貨 的 它 ， 競 爭 力 大 減 ， 四 面 楚 歌 、 節 節 敗 退 。 這 不 是 第 三 拳 ， 是 連 環 拳 。
「 我 話 你 聽 ， 入 冒 牌 貨 ， 利 錢 深 50% ， 但 係 用 乜 材 料 做 就 冇 人 敢 保 證 ， 我 要 轉 容 乜 易 ？ 我 過 唔 到 自 己 。
我 寧 願 捱 打 ， 起 碼 晚 黑 得 覺 。 」 黑 黑 實 實 的 大 發 行 老 闆 鮑 文 傑 說 。
世 道 變 遷 、 人 心 不 古 。 然 而 ， 君 子 有 所 為 ， 有 所 不 為 。
今 天 ， 它 給 打 到 眼 青 面 腫 ， 仍 未 低 ， 依 然 蹣 跚 奮 起 ， 擺 起 架 勢 迎 戰 、 誓 不 低 頭 。

大 家 姐 鮑 文 霞 　 主 力 門 市 發 展 ， 大 發 行 強 項 的 雪 糕 雪 條 就 是 她 一 手 引 入 。

早 上 ， 西 營 盤 第 三 街 的 大 發 行 門 市 剛 開 門 營 業 ， 店 內 三 個 穿 圍 裙 的 女 工 ， 正 對 一 箱 箱 剛 從 日 本 空 運 來 的 雪 糕 雪 條 ， 密 密 手 的 拆 箱 ， 逐 盒 逐 盒 貼 標 籤 ， 然 後 放 進 雪 糕 櫃 待 售 ， 忙 到 頭 殼 頂 出 煙 。
「 政 府 規 定 ， 原 產 地 標 籤 入 面 內 容 ， 全 部 要 翻 譯 成 中 文 至 賣 得 ， 我 收 貨 ， 咪 即 刻 翻 譯 即 刻 打 印 即 刻 貼 ， 好 多 做 ！ 你 睇 barcode ， 全 部 49code ， 49 呢 個 組 合 係 代 表 日 本 咁 解 ， 我 雪 糕 、 醬 料 、 拉 麵 、 零 食 … … 總 之 全 部 貨 品 都 係 呢 個 code ， 咁 多 年 都 係 一 樣 ， 全 部 都 係 日 本 原 裝 入 口 貨 ， 全 部 有 license ， 邊 個 check 都 冇 所 謂 。 」 其 中 一 個 師 奶 模 樣 的 女 工 說 。
這 女 工 ， 不 是 女 工 那 麼 簡 單 ， 她 叫 鮑 文 霞 ， 人 稱 陸 太 ， 今 年 五 十 多 歲 ， 紮 起 頭 髮 、 打 扮 樸 素 ， 是 大 發 行 創 始 人 之 一 。 他 和 兩 個 弟 弟 鮑 文 偉 和 鮑 文 傑 ， 共 同 打 理 大 發 行 已 有 二 十 七 年 ， 三 姐 弟 各 司 其 職 ， 她 主 要 負 責 門 市 部 分 ， 兩 個 弟 弟 則 主 理 業 務 發 展 和 批 發 。

去 年 底 在 同 街 開 設 壽 司 刺 身 外 賣 店 ， 邁 出 食 肆 第 一 步 。

遇 有 貨 返 ， 老 闆 娘 也 要 落 手 落 腳 。

二 十 七 年 間 ， 三 人 夾 手 夾 腳 ， 把 大 發 行 由 一 個 小 小 寫 字 樓 ， 發 展 到 今 日 在 第 三 街 有 四 個 鋪 位 ， 金 鐘 港 麗 酒 店 、 迪 士 尼 集 團 都 是 向 它 訂 貨 ， 總 算 有 點 成 績 。
「 有 乜 成 績 ！ 我 呢 魚 毛 仔 生 意 ， 個 個 都 要 落 手 落 腳 做 。 唔 似 人 大 行 ， 老 細 身 光 頸 靚 ， 又 養 車 又 養 馬 ， 賺 到 盆 滿 缽 滿 。 」 她 暗 帶 諷 刺 的 說 。
做 日 本 食 品 代 理 而 又 養 馬 養 到 出 晒 名 的 ， 當 數 行 內 最 好 生 意 的 大 亞 老 闆 許 威 望 ， 旗 下 名 駒 包 括 芝 麻 雪 糕 、 稻 庭 烏 冬 等 ， 都 以 日 本 食 物 為 名 。 他 是 灣 仔 星 街 、 月 街 的 山 寨 王 ， 整 條 月 街 差 不 多 都 是 他 的 寫 字 樓 和 貨 倉 ， 全 是 自 置 物 業 。 2005 年 就 有 傳 媒 給 他 統 計 過 ， 他 在 星 街 和 月 街 共 持 有 約 二 十 個 物 業 ， 當 時 太 古 集 團 曾 問 過 價 想 收 購 來 發 展 ， 他 開 價 過 億 元 ， 相 當 把 炮 。

二 弟 鮑 文 傑 　 曾 在 廉 署 行 動 組 工 作 ， 公 司 的 批 發 和 管 理 ， 也 由 他 負 責 。

小 小 超 市 ， 麻 雀 雖 小 ， 但 零 食 飲 品 凍 肉 乾 貨 一 應 俱 全 。

大 亞 創 始 人

「 佢 叻 ！ 佢 真 係 叻 ！ 我 今 時 今 日 都 讚 佢 叻 ！ 佢 叻 乜 ？ 叻 手 段 ！ 做 生 意 ， 邊 個 夠 手 段 就 邊 個 贏 啦 ！ 」 陸 太 說 。
一 講 大 亞 兩 個 字 ， 她 語 氣 總 帶 一 股 酸 溜 溜 的 味 道 ， 忍 不 住 追 問 下 去 ， 才 發 現 原 來 她 和 大 亞 ， 有 一 段 意 憤 難 平 的 過 去 。
「 大 亞 本 來 係 我 同 我 老 公 開 ！ 即 使 佢 （ 許 威 望 ） 而 家 我 面 前 ， 我 都 係 咁 講 。 」 她 一 字 一 字 吐 出 來 。
她 說 的 ， 已 經 是 差 不 多 三 十 多 年 前 的 舊 事 了 。 不 過 這 舊 事 ， 有 兩 個 版 本 。
陸 太 的 版 本 ， 是 七 十 年 代 ， 她 和 丈 夫 本 在 上 環 開 設 福 祿 壽 旅 行 社 ， 專 帶 團 去 台 灣 ， 來 回 順 道 走 水 貨 ， 帶 點 金 菇 、 大 等 台 灣 日 式 物 產 回 來 賣 給 食 肆 。 後 來 發 現 日 本 物 產 有 商 機 ， 就 求 教 於 當 時 全 港 唯 一 的 日 本 食 品 入 口 商 近 藤 ， 近 藤 為 她 提 供 了 入 口 日 本 貨 品 的 門 路 ， 夫 婦 倆 便 索 性 轉 行 ， 開 設 大 亞 食 品 公 司 ， 入 口 日 本 食 品 。

4 和 9 兩 字 組 合 ， 代 表 產 品 來 自 日 本 。

產 品 標 籤 即 譯 即 印 即 貼 ， 列 明 成 分 和 食 用 日 期 。

後 來 為 了 籌 措 資 金 ， 邀 許 威 望 入 股 合 作 經 營 ， 未 幾 因 意 見 不 合 拆 夥 ， 許 氏 另 註 冊 了 大 亞 日 本 食 品 公 司 ， 旗 下 戶 口 也 跟 隨 過 檔 ， 陸 氏 夫 婦 打 回 原 形 ， 被 迫 另 起 爐 灶 。
然 而 ， 打 電 話 給 大 亞 許 威 望 求 證 ， 他 說 了 另 一 版 本 。
「 大 亞 食 品 公 司 ， 係 我 、 陸 氏 兄 弟 同 另 一 位 股 東 吳 先 生 1976 年 一 齊 註 冊 ， 時 公 司 代 理 台 灣 涼 果 。 1980 年 因 為 股 東 意 見 不 合 拆 夥 ， 大 亞 食 品 公 司 結 束 ， 我 自 己 開 大 亞 日 本 食 品 公 司 ， 開 始 入 口 日 本 食 品 ， 呢 間 公 司 係 我 獨 資 ， 雖 然 都 叫 大 亞 ， 但 同 上 一 間 完 全 無 關 。 」
幾 十 年 前 事 ， 已 成 羅 生 門 ， 外 人 難 以 深 究 誰 是 誰 非 ， 但 大 亞 食 品 公 司 結 束 ， 一 切 推 倒 ， 卻 是 個 不 爭 的 事 實 。 只 是 陸 生 經 不 起 打 擊 ， 意 興 闌 珊 不 再 涉 足 生 意 ， 剩 下 陸 太 一 個 女 子 ， 由 零 開 始 收 拾 舊 山 河 ， 千 頭 萬 緒 ， 不 知 從 何 入 手 。 然 而 ， 禍 兮 福 所 倚 ， 最 寶 貴 的 東 西 ， 就 在 最 嚴 峻 的 考 驗 中 顯 露 出 來 。

哥 哥 文 偉 是 日 本 通 ， 專 職 赴 日 拉 生 意 。

超 市 和 旁 邊 的 貨 倉 ， 也 是 自 置 物 業 。

兄 弟 姊 妹 兵

「 千 算 萬 算 ， 就 係 算 漏 我 屋 企 咁 團 結 。 時 家 姐 一 鋪 清 袋 ， 冇 晒 貨 又 冇 晒 客 ， 一 生 意 都 做 唔 到 。 我 咪 撐 佢 ！ 全 家 總 動 員 出 撐 佢 ， 阿 爸 阿 媽 挖 晒 錢 出 ， 我 同 阿 哥 幫 手 。 冇 鋪 ， 咪 屋 企 開 檔 。 一 千 呎 屋 ， 又 要 住 人 、 又 要 擺 貨 ， 雪 櫃 都 要 買 幾 個 ， 連 廁 所 都 塞 滿 晒 貨 。 」 陸 太 弟 弟 鮑 文 傑 說 。
鮑 文 傑 ， 今 年 四 十 六 歲 ， 個 子 矮 壯 ， 黑 黑 實 實 ， 說 話 帶 點 火 爆 ， 大 大 聲 聲 ， 一 副 戰 鬥 格 模 樣 。 他 本 在 加 拿 大 唸 商 科 ， 回 港 後 曾 在 廉 政 公 署 行 動 組 工 作 ， 後 來 家 姐 出 事 ， 他 便 過 來 幫 手 ， 由 會 計 入 賬 到 倉 務 送 貨 都 一 腳 踢 ， 任 勞 任 怨 ， 擔 擔 抬 抬 也 沒 問 題 。
「 兄 弟 姊 妹 係 咁 啦 ！ 我 唔 算 好 ！ 我 大 佬 仲 好 ！ 咪 睇 佢 斯 斯 文 文 ， 時 客 一 個 電 話 話 要 貨 ， 佢 一 聲 唔 出 就 托 廿 斤 麵 豉 上 膊 頭 ， 一 支 公 搭 地 鐵 由 魚 涌 去 葵 涌 送 貨 ， 廿 斤 喎 ！ 你 估 講 笑 呀 ！ 」 他 說 。
他 口 中 的 大 佬 ， 是 鮑 文 偉 ， 他 本 在 地 鐵 公 司 有 份 穩 定 職 業 ， 見 家 有 需 要 ， 便 毅 然 離 職 過 來 全 職 幫 忙 ， 晨 昏 顛 倒 ， 沒 計 較 過 半 句 。
他 個 性 外 向 ， 擅 長 交 際 ， 是 大 發 行 前 線 掌 舵 大 員 ， 專 門 赴 日 開 拓 商 機 。 採 訪 期 間 ， 他 正 身 在 日 本 公 幹 ， 不 知 歸 期 ， 香 港 的 業 務 ， 就 交 由 文 霞 、 文 傑 兩 姐 弟 打 理 。
「 兄 弟 姊 妹 做 ， 勝 在 冇 隔 夜 仇 。 我 姐 弟 個 個 性 格 都 唔 同 ， 家 姐 細 心 ， 睇 門 市 最 好 。 大 佬 長 袖 善 舞 ， 容 易 拉 生 意 。 拉 到 生 意 就 由 我 去 執 行 ， 我 份 人 比 較 企 硬 ， 唔 會 蝕 底 。 」 鮑 文 傑 說 。

地 方 雖 隔 涉 ， 但 不 少 客 人 專 誠 坐 的 士 來 入 貨 。

超 市 前 身 是 寫 字 樓 ， 六 、 七 年 前 才 改 建 成 門 市 。

大 發 行 對 員 工 不 俗 ， 見 通 脹 加 劇 ， 今 年 四 月 份 起 ， 增 設 通 脹 津 貼 ， 由 5%-20% ， 真 箇 坊 間 少 見 。

一 張 張 訂 單 貼 滿 寫 字 樓 玻 璃 ， 以 雪 糕 雪 條 最 多 。

捱 過 風 浪 急

所 謂 打 死 不 離 親 兄 弟 ， 大 亞 一 役 ， 反 而 激 發 起 鮑 氏 姐 弟 的 團 結 ， 大 發 行 站 穩 陣 腳 ， 重 新 起 步 ， 碰 正 八 十 年 代 崇 日 熱 潮 ， 日 本 食 肆 如 雨 後 春 筍 進 入 市 場 ， 日 本 食 品 諸 如 醬 油 粉 麵 糖 果 餅 乾 汽 水 … … 全 都 有 龐 大 需 求 ， 當 時 市 場 上 只 得 近 藤 和 大 亞 兩 間 入 口 公 司 ， 根 本 供 不 應 求 ， 大 發 行 窺 準 機 會 ， 積 極 找 客 戶 ， 捱 了 一 段 時 間 ， 終 於 搶 回 個 第 三 位 置 。
「 我 魚 涌 租 個 地 方 開 鋪 ， 終 於 唔 使 逼 屋 企 。 後 來 大 佬 睇 中 第 三 街 呢 度 ， 貪 佢 偏 僻 ， 停 車 上 落 貨 方 便 ， 起 初 租 ， 後 尾 大 佬 話 租 唔 長 遠 ， 寧 願 捱 十 幾 厘 高 息 都 要 買 佢 落 。 」 鮑 文 傑 說 。
大 哥 的 眼 光 ， 成 了 大 發 行 往 後 一 根 救 命 繩 。

團 結 是 力 量 ， 家 姐 和 細 佬 同 一 陣 線 ， 大 發 行 就 是 一 捆 不 易 折 彎 的 竹 枝 。

七 十 多 款 口 味 的 雪 糕 雪 條 ， 大 部 分 是 獨 賣 ， 坊 間 找 不 到 。

因 為 市 場 從 來 像 天 氣 ， 風 雲 變 幻 、 難 以 猜 測 。 經 歷 了 八 十 年 代 和 九 十 年 代 初 的 好 景 ， 香 港 經 濟 在 回 歸 後 急 促 改 變 。 97 金 融 風 暴 後 ， 經 濟 崩 潰 ， 剛 建 立 的 業 務 受 到 巨 大 衝 擊 。 幾 年 後 ， 再 來 一 個 沙 士 ， 食 肆 首 當 其 衝 ， 門 堪 羅 雀 。 倒 閉 的 倒 閉 、 走 數 的 走 數 ， 大 公 司 如 八 佰 伴 、 超 等 結 業 ， 一 走 就 是 六 個 月 數 ， 牽 涉 數 額 達 到 幾 百 萬 。 大 發 行 一 下 子 壓 住 了 許 多 爛 賬 ， 錢 收 不 回 ， 貨 也 出 不 了 去 ， 三 姐 弟 坐 在 貨 倉 ， 你 眼 望 我 眼 ， 一 下 子 無 計 可 施 。
「 最 慘 係 貨 ， 做 食 物 最 麻 煩 係 有 賞 味 期 限 ， 好 似 醬 油 咁 ， 賞 味 期 限 得 六 個 月 ， 之 前 入 貨 ， 焗 住 要 ， 成 箱 成 箱 抬 去 對 面 垃 圾 站 ， 錢 ！ 睇 到 都 心 痛 ！ 」 陸 太 說 。
錢 連 連 的 蝕 ， 幸 好 貨 倉 是 自 己 的 地 方 ， 不 用 納 租 予 人 ， 總 算 減 輕 了 大 幅 負 擔 ， 否 則 光 是 付 租 金 ， 後 果 都 不 堪 設 想 。 為 了 減 低 損 失 ， 他 們 只 好 壯 士 斷 臂 ， 把 快 到 期 的 貨 割 價 八 折 出 售 ， 一 個 星 期 仍 售 不 出 ， 就 買 一 送 一 。 最 後 仍 賣 不 出 ， 便 以 買 A 送 BC 的 捆 綁 式 ， 監 平 監 賤 清 貨 ， 賺 得 一 毫 得 一 毫 ， 幫 補 損 失 。 一 分 一 毫 ， 慢 慢 捱 過 了 難 關 。

正 貨 （ 左 ） 和 A 貨 ， 印 到 幾 乎 一 模 一 樣 ， 看 了 半 天 也 分 不 到 。

鹿 兒 島 黑 豚 也 有 出 售 ， 售 價 較 大 型 超 市 便 宜 。

殺 出 新 血 路

「 可 能 以 前 得 太 多 ， 而 家 入 貨 好 小 心 ， 好 似 奶 類 食 品 咁 ， 第 一 次 最 多 入 幾 箱 ， 睇 市 場 反 應 先 再 入 。 係 呀 ！ 反 應 好 就 見 財 化 水 喇 ！ 好 似 上 個 禮 拜 有 隻 99% 草 原 物 語 牛 奶 ， 入 幾 十 盒 ， 兩 日 就 賣 晒 ， 而 家 都 未 返 貨 。 」 陸 太 說 。
日 本 奶 類 食 品 ， 由 於 容 易 變 壞 ， 在 行 內 屬 高 風 險 貨 品 ， 許 多 入 口 商 寧 願 多 入 乾 貨 類 食 品 ， 對 奶 類 食 品 和 雪 糕 、 雪 條 等 敬 而 遠 之 ， 沒 刻 意 拓 展 貨 種 ， 總 之 保 持 有 得 賣 就 算 。
但 有 危 才 有 機 ， 要 殺 出 重 圍 就 要 冒 險 ， 也 就 是 這 高 風 險 食 品 ， 替 大 發 行 在 芸 芸 勁 敵 中 殺 出 一 條 血 路 。 那 是 沙 士 過 後 ， 市 場 動 盪 ， 人 人 都 不 敢 入 貨 ， 更 遑 論 奶 類 製 品 這 些 高 風 險 食 品 。 大 發 行 卻 看 準 時 機 ， 兵 行 險 ， 專 攻 這 雪 糕 、 雪 條 市 場 ， 規 定 駐 日 本 人 員 ， 搜 購 各 式 各 樣 雪 糕 雪 條 等 貨 品 ， 每 個 月 都 有 新 貨 返 港 ， 個 個 月 都 有 新 貨 在 門 市 推 出 ， 慢 慢 建 立 了 款 多 又 新 的 形 象 。
「 我 覺 得 佢 雪 條 好 特 別 ， 出 面 搵 唔 到 ， 好 似 呢 隻 新 奇 士 檸 檬 沙 冰 雪 條 ， 我 行 勻 日 本 超 市 都 唔 見 。 」 來 買 雪 條 的 OL 說 。

經 過 五 年 的 努 力 ， 大 發 行 成 功 攻 佔 了 凍 品 甜 點 市 場 ， 入 口 的 雪 糕 、 雪 條 種 類 成 了 行 內 最 多 ， 達 七 十 多 款 ， 明 治 、 固 力 果 、 雪 印 、 Ohiyo 等 都 有 ， 許 多 更 是 獨 有 貨 品 ， 成 功 建 立 了 行 內 地 位 ， 第 一 次 做 一 哥 。
「 雪 糕 雪 條 我 夠 膽 講 我 最 強 ， ！ 呢 隻 係 固 力 果 抹 茶 雪 糕 ， 至 返 。 呢 隻 係 明 治 果 肉 雪 條 ， 入 面 有 沖 繩 菠 蘿 肉 ！ 上 個 禮 拜 至 日 本 推 出 ， 任 你 崇 光 、 Apita 、 city'super 都 冇 ！ 」 陸 太 說 。
除 了 雪 糕 、 雪 條 款 式 勁 多 勁 新 之 外 ， 其 他 貨 品 ， 許 多 定 價 也 比 別 人 便 宜 ， 像 日 本 鹿 兒 島 黑 豚 豬 扒 ， 只 售 $250/kg ， 比 外 間 高 級 雜 貨 店 和 超 市 要 便 宜 三 分 一 ， 許 多 熟 客 都 來 這 買 。
「 點 解 咁 平 ？ 我 自 己 鋪 ， 唔 使 交 租 。 又 冇 大 公 司 咁 多 行 政 費 ， 咪 可 以 平 ！ 」 陸 太 說 。
努 力 多 年 ， 大 發 行 總 算 靠 門 市 贏 回 一 仗 ， 惟 批 發 卻 始 終 落 後 ， 一 直 處 於 捱 打 狀 態 ， 大 集 團 、 大 酒 店 都 是 別 人 囊 中 物 ， 大 發 行 連 一 包 拉 麵 也 鑽 不 進 去 。
「 點 講 呢 ？ 呢 行 好 多 蠱 惑 招 。 好 似 呢 包 麵 同 呢 包 麵 ， 一 包 大 陸 做 ， 一 包 日 本 做 ， 但 係 包 裝 幾 乎 一 模 一 樣 ， 連 barcode 都 印 埋 49code ， 即 係 乜 呀 ？ 即 係 A 貨 ！ 」 鮑 文 傑 拿 兩 包 茶 麵 ， 怒 氣 沖 沖 說 。
這 A 貨 ， 在 大 陸 改 革 開 放 後 開 始 出 現 ， 近 十 年 在 香 港 愈 來 愈 多 ， 蓋 因 許 多 日 本 大 廠 都 在 國 內 設 廠 生 產 ， 配 方 和 技 術 給 不 法 商 人 盜 取 ， 卻 換 以 廉 價 材 料 ， 製 成 翻 版 流 入 香 港 ， 由 於 成 本 低 、 利 錢 深 ， 無 良 的 入 口 商 紛 紛 棄 明 投 暗 ， 魚 目 混 珠 ， 以 假 貨 代 替 真 貨 。 大 發 行 的 批 發 生 意 ， 在 不 斷 蠶 食 下 ， 愈 來 愈 困 難 。

貨 倉 堆 滿 貨 物 ， 連 人 行 都 幾 乎 有 問 題 。

提 起 翻 版 ， 鮑 文 傑 便 怒 不 可 竭 ， 要 把 冤 氣 吐 出 來 。

有 為 有 不 為

「 好 多 採 購 未 夠 道 行 ， 根 本 分 唔 出 ， 見 來 價 平 少 少 就 入 貨 。 入 口 商 咪 發 達 ！ 批 貨 價 平 過 我 少 少 ， 但 係 利 錢 就 多 多 ， 幾 好 搵 呀 ？ 日 本 貨 主 出 面 投 訴 都 冇 用 ， 因 為 即 使 呢 頭 ， 轉 個 頭 又 再 老 翻 ， 連 海 關 都 理 唔 到 咁 多 ， 我 咪 得 個 谷 氣 ！ 」 鮑 文 傑 說 。
這 邊 廂 A 貨 充 斥 ， 打 到 大 發 行 一 仆 一 碌 ， 那 邊 廂 大 發 行 又 要 應 付 另 一 個 強 勁 對 手 ， 國 產 正 牌 日 本 貨 。
「 呢 隻 仲 難 應 付 ， 佢 唔 係 老 翻 ， 係 大 陸 廠 生 產 日 本 貨 ， 講 真 ， 材 料 唔 通 全 部 由 日 本 運 過 咩 ？ 質 素 同 日 本 本 土 梗 有 出 入 啦 ！ 但 貨 價 平 一 截 ， 正 宗 日 貨 好 難 頂 。 」 鮑 文 傑 說 。
這 種 貨 ， 許 多 餐 廳 食 肆 都 樂 用 ， 因 為 品 牌 正 宗 ， 不 會 給 客 人 懷 疑 ， 但 價 格 又 較 原 產 日 貨 平 ， 計 落 條 數 有 數 ， 劣 幣 驅 逐 良 幣 ， 正 牌 日 產 貨 ， 逐 漸 愈 來 愈 少 人 用 。
與 其 坐 以 待 斃 、 不 如 主 動 出 擊 ， 為 了 抗 衡 這 兩 個 勁 敵 ， 入 了 二 十 多 年 日 本 本 土 貨 的 大 發 行 ， 年 前 也 讓 了 一 步 ， 引 入 較 廉 價 的 大 陸 廠 製 日 本 食 品 ， 但 他 沒 有 側 側 膊 ， 拉 麵 、 茶 麵 、 醬 油 … … 全 以 神 戶 系 列 作 名 稱 ， 包 裝 列 明 原 產 地 ， made in china 就 made in china ， 均 均 真 真 ， 無 花 無 假 。
「 我 話 你 知 ， 做 生 意 講 ， 大 發 行 係 一 間 好 戇 居 公 司 。 A 貨 好 賺 你 唔 賺 ， 大 陸 貨 又 講 明 俾 人 聽 係 大 陸 貨 。 不 過 呢 個 世 界 ， 人 人 都 賺 到 盡 、 個 個 精 過 龍 ， 我 錢 賺 唔 到 咁 多 ， 但 係 我 賺 到 安 樂 。 做 生 意 同 做 人 一 樣 ， 是 非 黑 白 要 有 界 線 ， 要 對 得 住 天 地 良 心 ！ 」 鮑 文 傑 說 。
天 地 良 心 ， 在 高 速 發 展 的 經 濟 社 會 ， 早 已 是 個 落 後 的 名 詞 。 也 許 ， 大 發 行 永 遠 不 會 成 為 業 內 的 No.1 ， 但 它 卻 是 個 不 容 易 被 擊 倒 的 拳 手 ， 捱 了 連 番 重 擊 ， 仍 堅 持 信 念 迎 向 前 ， 即 使 最 終 輸 掉 比 賽 ， 也 會 贏 得 掌 聲 。

大 發 行 揀 手 貨

大 發 行 現 時 約 有 三 千 多 款 日 本 貨 品 ， 由 醬 油 粉 麵 果 汁 零 食 … …
以 至 日 常 生 活 用 品 都 有 ， 簡 直 千 頭 萬 緒 ， 眼 花 繚 亂 。
以 下 精 選 貨 品 ， 全 是 日 本 本 土 入 口 ， 部 分 是 大 發 行 專 賣 貨 品 、 部 分 售 價 比 坊 間 便 宜 ， 有 些 則 是 最 人 氣 產 品 ， 俱 是 揀 手 之 選 。

1 Cisco's 燒 番 薯 軟 身 曲 奇 $15/ 包
崇 光 、 吉 之 島 都 可 找 到 ， 但 這 卻 要 便 宜 兩 三 蚊 。 一 包 有 十 粒 ， 全 是 獨 立 包 裝 ， 拆 開 已 聞 到 濃 香 番 薯 味 ， 吃 入 口 軟 軟 香 香 ， 十 足 街 邊 燒 番 薯 的 味 道 。
2 Kaisou 海 藻
它 不 是 零 食 ， 是 用 來 伴 沙 律 或 伴 湯 麵 吃 的 。 高 纖 健 康 ， 用 水 浸 幾 分 鐘 便 吃 得 ， 口 感 清 爽 ， 勁 受 綠 色 人 士 歡 迎 ， 是 新 近 人 氣 產 品 。
3 新 潟 米 $110/2kg
做 壽 司 必 選 材 料 ， 一 般 日 式 超 市 都 找 得 到 ， 惟 這 勝 在 便 宜 ， 2kg 只 賣 $110 ， 外 間 最 少 都 要 $130 。
4 廣 中 製 七 彩 果 汁 硬 糖 4$/ 包
賣 相 很 懷 舊 ， 似 足 細 個 吃 過 的 棍 仔 果 汁 糖 。 一 包 有 四 支 ， 甜 甜 的 很 襟 吮 。
5 森 永 朱 古 力 pancake 粉 $22/ 包
許 多 日 本 主 婦 專 誠 來 買 回 家 煎 班 戟 ， 因 為 外 間 多 是 原 味 ， 這 卻 有 朱 古 力 味 。 粉 內 真 的 有 朱 古 力 粒 ， 加 蛋 加 水 拌 勻 ， 放 平 底 鑊 煎 至 香 噴 噴 即 可 ， 勁 方 便 。
6 EBARA 牛 丼 汁 $40/ 支
是 哈 日 年 輕 夫 婦 人 氣 物 品 ， 勝 在 方 便 易 用 。 一 份 牛 丼 汁 加 一 份 水 ， 拌 煮 洋 絲 及 肥 牛 ， 淋 在 飯 上 就 是 一 碗 超 正 牛 丼 飯 。
7 Ninben 鰹 魚 冷 麵 汁 $26/ 支
超 好 用 的 冷 麵 汁 ， 以 一 份 汁 三 份 水 開 稀 便 可 ， 除 作 冷 麵 汁 多 ， 也 可 蘸 天 婦 羅 和 做 日 式 烏 冬 湯 汁 ， 日 式 超 市 要 賣 三 十 多 元 一 支 ， 這 廿 多 元 就 買 到 。
8 紅 茶 姬 罐 裝 奶 茶 $9/ 罐
售 了 兩 年 左 右 ， 一 直 是 店 內 人 氣 貨 品 。 味 道 比 一 般 罐 裝 濃 ， 紅 茶 香 和 牛 奶 味 混 得 很 平 衡 ， 不 會 太 重 奶 味 。
9 Sangaria 蘋 果 汁 及 桃 汁 $7.5/ 罐
日 本 碳 酸 飲 品 大 廠 ， 以 梳 打 汽 水 馳 名 ， 入 口 果 味 香 而 不 嗆 喉 。 以 蘋 果 及 桃 味 最 受 年 輕 人 歡 迎 ， 外 間 要 賣 $8-$9/ 罐 ， 這 $7.5 ， 又 平 一 點 ， 買 開 東 西 ， 不 妨 順 便 擸 埋 。

10 固 力 果 PREMIO 朱 古 力 雪 糕 $49/6 杯
PREMIO 系 列 是 固 力 果 今 季 才 在 日 本 推 出 的 ， 未 夠 一 個 月 大 發 行 已 入 了 貨 ， 厲 害 ！ 雪 糕 是 薄 荷 味 混 朱 古 力 碎 粒 ， 入 口 清 新 得 來 又 有 很 濃 朱 古 力 味 。
11 Ohiyo 沖 繩 菠 蘿 雪 葩 $39/7 支
這 雪 葩 兩 三 年 前 曾 在 日 本 推 出 過 ， 頗 受 歡 迎 ， 但 不 知 何 故 後 來 停 產 。 直 至 月 前 再 在 日 本 市 場 露 面 ， 大 發 行 立 刻 入 了 貨 ， 外 間 找 不 到 。 雖 云 是 雪 葩 ， 但 入 口 是 雪 糕 質 感 ， 濃 香 的 菠 蘿 汁 混 在 牛 奶 內 ， 很 滑 很 香 。
12 明 治 水 果 沙 冰 雪 條 $39
也 是 外 間 沒 有 的 日 本 新 季 產 品 ， 有 西 柚 及 菠 蘿 味 兩 種 ， 外 層 是 果 汁 雪 條 ， 中 間 是 粗 粒 果 汁 沙 冰 ， 咬 一 口 沙 冰 咯 咯 有 聲 ， 很 過 癮 。
13 固 力 果 雪 糕 杯 $49/6 杯
是 混 合 雪 糕 杯 ， 已 推 出 了 幾 年 ， 但 年 年 都 轉 新 口 味 ， 今 年 是 提 子 、 士 多 啤 梨 及 朱 古 力 X 咖 啡 ， Size 迷 你 ， 雪 糕 癡 一 次 吃 三 杯 也 不 嫌 多 。
14 丸 永 抹 茶 紅 豆 白 玉 雪 條 $49/6 支
外 間 鮮 見 ， 卻 是 大 發 行 賣 了 5 年 的 熱 賣 貨 。 外 是 抹 茶 雪 條 ， 中 層 有 粒 粒 紅 豆 ， 最 底 一 層 混 了 糯 米 ， 三 層 口 感 味 道 都 不 同 ， 正 ！
15 五 木 炒 麵 $24/4 包
是 熟 麵 ， 入 口 彈 牙 ， 放 少 許 油 炒 熱 即 可 ， 簡 單 易 做 快 過 即 食 麵 ， 最 受 二 人 家 庭 小 夫 妻 歡 迎 。
16 秋 田 縣 後 文 本 鋪 手 製 稻 庭 烏 冬 $80/ 包
後 文 本 鋪 是 手 打 稻 庭 烏 冬 老 字 號 ， 麵 條 口 感 嫩 滑 而 煙 韌 ， 似 足 日 本 吃 到 的 。 煮 五 六 分 鐘 吃 得 ， 冷 熱 皆 宜 ， 外 間 門 市 並 不 多 見 ， 卻 是 部 分 五 星 酒 店 日 本 餐 廳 專 用 。
17 山 里 炭 烏 冬 $31/ 包
近 期 潮 吃 炭 ， 這 也 有 炭 烏 冬 賣 ， 黑 的 烏 冬 是 混 了 食 用 炭 粉 來 打 的 ， 口 感 不 及 後 文 本 鋪 手 製 稻 庭 烏 冬 滑 ， 但 價 錢 卻 平 幾 乎 三 分 二 ， 適 合 家 庭 粗 吃 。
18 Cisco's 紅 茶 餅 $11.5/ 包
OL 至 愛 ， 淡 淡 紅 茶 味 中 有 少 許 檸 檬 清 香 ， 悶 悶 吃 兩 片 ， 不 會 太 heavy 。

鹿 兒 島 黑 豚 腩 片 $120/500g
也 是 從 日 本 真 空 包 裝 過 來 ， 油 花 較 多 ， 打 邊 爐 最 適 合 。

鹿 兒 島 黑 豚 肉 眼 $250/1kg
日 本 真 空 空 運 來 港 ， 有 證 書 ， 售 價 比 名 牌 超 市 平 約 三 分 一 ， 抵 吃 。

牡 丹 蝦 刺 身 $350/ 盒
原 裝 日 本 入 口 ， 一 盒 有 21 至 24 隻 ， 解 凍 後 可 吃 ， 肉 味 鮮 甜 ， 肉 質 爽 口 。

雪 場 蟹 柳 條 $50/30 條
蟹 肉 豐 厚 實 淨 ， 一 絲 絲 拆 得 開 ， 味 道 帶 鹹 ， 做 沙 律 或 打 邊 爐 都 得 。

廣 島 冷 凍 生 蠔 $120/ 包
屬 珍 珠 蠔 ， 體 積 較 細 ， 可 一 口 一 隻 ， 有 海 水 味 ， 肉 滑 鮮 甜 。

還 有 凍 肉 海 產

除 了 雪 糕 零 食 乾 貨 ， 大 發 行 的 凍 肉 、 海 產 也 便 宜 ， 也 是 日 本 入 口 ， 質 素 不 俗 。

大 發 行

地 址 ： 西 營 盤 第 三 街 43-47 號
電 話 ： 2548 5333
營 業 時 間 ： 8:30am-7pm( 星 期 日 休 息 )

撰 文 ： 譚 偉 健
攝 影 ： 鄧 廣 基